2026-04-20
Irteera Algorri interpretazio zentroko Ane teknikariaren gidaritzapean hasi zen. Lehenik, azalpen teorikoak jaso zituzten ikasleek, Mutriku eta Zumaia artean kokatzen den eta duela 100 eta 50 milioi urte artean eratutako Flysch egituraren inguruan. Era berean, gaur egun Zumaian itsasgora eta itsasbeheraren arteko eremuan ikus daitezkeen animalia espezieei buruzko azalpenak ere jaso zituzten.
Ondoren, itsasbeherak baldintzatutako ordutegia aprobetxatuz, marea arteko gunea bertatik bertara ezagutzeko aukera izan zuten. Bisitan zehar, hainbat itsas espezie ikusi eta aztertzeko aukera izan zuten: arrain txikiak, anemonak, karramarro mota ezberdinak, itsas trikuak, itsas pepinoak, karakolak, ermitariak, baita olagarrotxo bat eta izkirak ere, besteak beste. Bildutako aleak kuboetan behatu ondoren, guztiak beren habitat naturalean askatu zituzten.
Irteerari amaiera emateko, Zumaiako ermita eta Itzurun hondartza bisitatu zituzten, eta ondoren Markina-Xemeinera itzuli ziren.
Eguraldia lagun, ikasleek ikaskuntza esanguratsua eta esperientzia atsegina uztartzeko aukera izan zuten.
